"Müasir dünyada informasiya adi xəbər olmaqla məhdudlaşmır, beynəlxalq münasibətlərin, ictimai rəyin və iqtisadi inkişafın əsas hərəkətverici qüvvəsinə çevrilərək xalqlar arasında etimadın və anlayışın formalaşmasında mühüm rol oynayır". Bu fikir Azərbaycan Prezidenti İlham Əliyevin "Dialoqun, əməkdaşlığın və regional həmrəyliyin təşviq edilməsi" mövzusunda D-8 Media Forumunun iştirakçılarına müraciətində yer alıb. Prezident, qlobal informasiya mühitində dezinformasiya, saxta xəbərlər, “deepfake” və süni intellektdən sui-istifadə hallarının artdığını bildirib. Dövlət başçısı deyib ki, bu proseslər ölkələrin imicinə və beynəlxalq sabitliyə mənfi təsir göstərir. Onun sözlərinə görə, Forumun əsas məqsədlərindən biri üzv ölkələrin media qurumları arasında etibarlı əməkdaşlıq yaradaraq obyektiv informasiya mühitini təmin etməkdir. Prezident qeyd edib ki, Azərbaycan media sahəsində beynəlxalq təşəbbüslərə öncülük edir, faktlara əsaslanan jurnalistikanın və media savadlılığının inkişafına xüsusi diqqət yetirir.